នៅក្នុងពិធីបើកកិច្ចប្រជុំរដ្ឋមន្រ្តីសេដ្ឋកិច្ចអាស៊ាន នៅថ្ងៃសុក្រ ៨ មេសា ២០១១នេះ លោកស៊ូស៊ីឡូ បាំបាង យូដូយ៉ូណូ (Susilo Bambang Yudhoyono) ប្រធានាធិបតីឥណ្ឌូណេស៊ី បានសង្កត់ធ្ងន់ជាពិសេសទៅលើបញ្ហាអតិផរណា ដែលអាចជាឧបសគ្គដល់កំណើនសេដ្ឋកិច្ចអាស៊ាន។ ក្រៅពីបញ្ហាអតិផរណា រដ្ឋមន្រ្តីសេដ្ឋកិច្ចទាំង១០របស់អាស៊ានក៏នឹងពិភាក្សាគ្នាផងដែរ អំពីការគ្រប់គ្រងលំហូរទុនវិនិយោគបរទេស។
ហេតុអ្វីអាស៊ានត្រូវបារម្ភពីលំហូរទុនវិនិយោគពីបរទេស?
“ផ្ទុយពីប្រទេសអភិវឌ្ឍន៍ ប្រទេសកំពុងអភិវឌ្ឍន៍នៅអាស៊ីបានងើបចេញពីវិបត្តិសេដ្ឋកិច្ចពិភពលោក បានលឿនជាងគេ និងកំពុងតែដើរតួជាកម្លាំងចលករមួយដ៏សំខាន់ នៃកំណើនសេដ្ឋកិច្ចពិភពលោក។ ក៏ប៉ុន្តែ យើងក៏មិនត្រូវសប្បាយភ្លេចខ្លួននឹងជោគជ័យនេះពេកដែរ”។ នេះ គឺជាប្រសាសន៍របស់ប្រធានាធិបតីឥណ្ឌូណេស៊ី និងជាប្រធានផ្លាស់វេនរបស់អាស៊ាន ក្នុងឱកាសបើកកិច្ចប្រជុំរដ្ឋមន្រ្តីសេដ្ឋកិច្ចអាស៊ាន នៅឥណ្ឌូណេស៊ី នៅថ្ងៃសុក្រនេះ។ ការឡើងថ្លៃចំណីអាហារ និងប្រេងកាត គឺជាបញ្ហា ដែលអាស៊ានត្រូវប្រឈមមុខ។ គ្រោះធម្មជាតិ និងការប្រែប្រួលអាកាសធាតុ ក៏អាចជាចំណោទមួយដ៏ធំដែរ សម្រាប់អាស៊ាន។
អត្រាអតិផរណានៅឥណ្ឌូណេស៊ីកំពុងមានកម្រិតខ្ពស់គួរឲ្យបារម្ភ (៦,៥%)។ រូពី (រូបិយប័ណ្ណរបស់ឥណ្ឌូណេស៊ី) ក៏បានឡើងថ្លៃខ្ពស់មិនធ្លាប់ឃើញមាន ក្នុងរយៈពេល ៤ឆ្នាំចុងក្រោយនេះ។ ទាំងនេះជាសញ្ញាបង្ហាញថា សេដ្ឋកិច្ចរបស់ឥណ្ឌូណេស៊ី ដែលជាមហាអំណាចសេដ្ឋកិច្ចទី១របស់អាស៊ាន ទំនងជាកំពុងប្រឈមមុខនឹងបញ្ហា។ នៅក្នុងប្រទេសសមាជិកអាស៊ានផ្សេងទៀត ក៏គេសង្កេតឃើញមានអត្រាអតិផរណាខ្ពស់ដែរ។
យោងតាមធនាគារអភិវឌ្ឍន៍អាស៊ី (ADB) កំណើនសេដ្ឋកិច្ចអាស៊ាន នៅឆ្នាំ២០១១នេះ នឹងនៅតែមានកម្រិតខ្ពស់ ក៏ប៉ុន្តែ មិនខ្ពស់ដូចកាលពីឆ្នាំ២០១០កន្លងទៅនេះទេ។ ក្រៅពីបញ្ហាអតិផរណា អាស៊ានអាចនឹងត្រូវប្រឈមមុខនឹងបញ្ហាមួយទៀត គឺលំហូរទុនវិនិយោគពីបរទេស។
វិបត្តិបំណុលសាធារណៈនៅអឺរ៉ុបកំពុងតែរាលដាលពីប្រទេសក្រិក និងអៀរឡង់ ឈានទៅដល់ប្រទេសព័រទុយហ្កាល់ ដែលជាហេតុធ្វើឲ្យអ្នកវិនិយោគបាត់បង់ទំនុកចិត្តលើទីផ្សារអឺរ៉ុប។ អាស៊ីកំពុងតែក្លាយជាទិសដៅវិនិយោគ ដែលអាចទទួលបានផលចំណេញជាងគេ។ ក៏ប៉ុន្តែ បញ្ហាដែលចោទឡើង សម្រាប់អាស៊ាន គឺនៅត្រង់ថា វិនិយោគបរទេស ដែលហូរចូលមកក្នុងប្រទេសអាស៊ាន ភាគច្រើនជាវិនិយោគរយៈពេលខ្លី (ដែលគេច្រើនហៅតាមភាសាអង់គ្លេសថា Hot Money) ដែលគេងាយនឹងដកចេញទៅវិញភ្លាមៗ។ លំហូរទុនវិនិយោគចេញចូលងាយស្រួលបែបនេះអាចនឹងធ្វើឲ្យប៉ះពាល់ដល់ ស្ថិរភាពសេដ្ឋកិច្ចអាស៊ាន។
គួរបញ្ជាក់ថា នៅក្នុងការវិនិយោគបរទេសរយៈពេលខ្លី (Hot Money) អ្នកវិនិយោគច្រើនតែផ្តោតទៅលើការបង្វែរដើមទុនទៅរកកន្លែងដែលមាន អត្រាការប្រាក់ខ្ពស់, ការទិញដូរដើម្បីយកចំណេញភ្លាមៗ ឬទិញដើម្បីគ្រាន់តែចាំលក់ទៅវិញយកចំណេញ (Speculation) ។ ផ្ទុយពីការវិនិយោគរយៈពេលវែង (ការកសាងហេដ្ឋារចនាសម្ព័ន្ធ, ការបង្កើតរោងចក្រសហគ្រាស ឬការបង្កើតមុខជំនួញផ្សេងៗ) ដែលផ្តល់ផលប្រយោជន៍ដល់សេដ្ឋកិច្ចរបស់ម្ចាស់ស្រុក ការវិនិយោគរយៈពេលខ្លីអាចជះឥទ្ធិពលអវិជ្ជមានទៅវិញ។
មូលនិធិរូបិយវត្ថុអន្តរជាតិ (FMI) ប្រចាំតំបន់អាស៊ីប៉ាស៊ីហ្វ៊ិកបានលើកឡើងថា វិនិយោគបរទេសនៅអាស៊ី នៅតែមានកម្រិតខ្ពស់។ ក៏ប៉ុន្តែ ដើម្បីទាញយកផលប្រយោជន៍ពីការវិនិយោគនេះ គេចាំបាច់ត្រូវតែចាត់វិធានការ ធ្វើយ៉ាងណាកម្រិតការវិនិយោគរយៈពេលខ្លី ហើយបង្វែរទុនទាំងនេះ ទៅជាការវិនិយោគរយៈពេលវែងវិញ។
បញ្ហាអតិផរណា និងការគ្រប់គ្រងលំហូរទុនវិនិយោគបរទេសនេះ គឺជាប្រធានបទដ៏ចម្បង ក្នុងកិច្ចប្រជុំរដ្ឋមន្រ្តីសេដ្ឋកិច្ចអាស៊ាន នៅថ្ងៃសុក្រនេះ។ លោកប្រធានាធិបតីឥណ្ឌូណេស៊ីក៏បានជំរុញផងដែរឲ្យសមាជិកអាស៊ានពន្លៀន ដំណើរការសមាហរ័ណកម្មសេដ្ឋកិច្ច ដើម្បីឈានទៅបង្កើតទីផ្សាររួមអាស៊ាន នៅឆ្នាំ២០១៥ខាងមុខ៕
Link:http://www.khmer.rfi.fr/indonesia-says-inflation-may-threaten-growth
No comments:
Post a Comment