ការវាយប្រហាររបស់កងទ័ពថៃទៅលើកម្ពុជាបានឈានដល់ថ្ងៃទី៤ហើយ។ ការវាយប្រហាររបស់កងទ័ពថៃនៅថ្ងៃនេះ មិនខ្លាំងក្លាដូចថ្ងៃទី៣ម្សិលមិញឡើយ ប៉ុន្តែទាហានថៃបានចាប់ផ្តើមប្រើប្រាស់យន្តហោះយោធាហោះតាមបណ្តោយ ព្រំដែន លើប្រាសាទតាមាន់ និងប្រាសាទតាក្របី ធ្វើអោយស្ថានការណ៍សង្គ្រាមកាន់តែតានតឹងថែមទៀត។ នៅថ្ងៃនេះដែរ រដ្ឋមន្ត្រីក្រសួងការបរទេសឥណ្ឌូណេស៊ីដែលមានគម្រោងមកកម្ពុជានៅថ្ងៃ នេះ ត្រូវលុបចោលដំណើរនេះវិញហើយ ដោយមិនបានបញ្ជាក់មូលហេតុ។
នៅម៉ោង១ និង៤៥នាទីរសៀលថ្ងៃចន្ទ ទី២៥នេះ កងទ័ពថៃបានប្រើប្រាស់យន្តហោះប្រយុទ្ធយោធា២គ្រឿង ហោះតាមបណ្តោយព្រំដែនអន្តរជាតិកម្ពុជា ថៃ លើតំបន់ប្រាសាទតាមាន់ និងតាក្របី ដែលសកម្មភាពនេះត្រូវបានយោធាកម្ពុជាវាយតម្លៃថា ជាសកម្មភាពញុះញង់ និងបង្កការគំរាមកំហែងដល់សន្តិសុខជាតិកម្ពុជា និងបានធ្វើអោយស្ថានភាពសឹកកាន់តែតានតឹងថែមទៀត។ ក្រោយមកបន្តិច នៅម៉ោង១ និង៥៥នាទី ទាហានក៏បានបាញ់ផ្លោងកាំភ្លើងធំធុន១៥៥មីល្លីម៉ែត្រ ចំនួន៦គ្រាប់ចូលតំបន់គោកមកជម្រៅ២២គមក្នុងទឹកដីកម្ពុជាដែលមានប្រជាជនស៊ីវិលកំពុងរស់នៅ។ ប៉ុន្តែមិនមានសេចក្តីរាយការណ៍ថា គ្រាប់ផ្លោងទាំងនោះបានប៉ះពាល់ដល់ជីវិតរបស់ទាហាន និងប្រជាពលរដ្ឋខ្មែរនោះឡើយ។
អ្នកនាំពាក្យក្រសួងការពារជាតិបានអះអាងថា កងទ័ពកម្ពុជានៅទប់ទល់នឹងការវាយប្រហាររបស់ទាហានថៃ ហើយបានឈរជើងនៅមូលដ្ឋានប្រាសាទតាមាន់ និងតាក្របីដដែល។ របាយការណ៍ក្រសួងការពារជាតិបានបង្ហាញថា គ្រាន់តែថ្ងៃអាទិត្យ ទី២៤ មេសាម្សិលមិញ មានការបាញ់ផ្លោងជាង១០០០គ្រាប់ពីកងទ័ពថៃ មកលើកងទ័ពខ្មែរដែលឈរជើងនៅតំបន់ប្រាសាទតាមាន់ និងតាក្របីក្នុងគោលបំណងចូលកាន់កាប់តំបន់ទាំងនេះ។ ក្នុងនោះមានការបាញ់ផ្លោងគ្រាប់កាំភ្លើងធំច្រើនប្រភេទជាង៣០០គ្រាប់ចូលក្នុងភូមិប្រជាពលរដ្ឋស៊ីវិលដែលស្ថិតនៅប្រមាណ២០គមចូលក្នុងទឹកដីកម្ពុជា។
នៅតែមិនមានពន្លឺនៃភាពស្ងប់ស្ងាត់ និងការឈប់បាញ់នៅតាមបណ្តោយព្រំដែន នៅពេលដែលកងទ័ពថៃនៅបន្តរុលចូល និងវាយឆ្មក់មកលើកងទ័ពកម្ពុជាជារៀងរាល់ថ្ងៃ ដោយគ្មានភាគីទី៣ណាចេញមុខដោះស្រាយនោះឡើយ។ ប្រធានអាស៊ាន ដែលរដ្ឋមន្ត្រីការបរទេសឥណ្ឌូណេស៊ី លោកMarty Natalegawa បានលុបចោលគម្រោងមកកម្ពុជានៅព្រឹកមិញនេះ។ ជាគម្រោងដែលត្រូវចុះហត្ថលេខាលើការដាក់ពង្រាយអ្នកសង្កេតការណ៍ឥណ្ឌូណេស៊ីនៅតាមព្រំដែន។ លោកកុយ គួង អ្នកនាំពាក្យក្រសួងការបរទេសកម្ពុជាបានអត្ថាធិប្បាយសោកស្តាយចំពោះការខកខានមិនបានចុះហត្ថលេខាលើឯកសារស្តីពីល័ក្ខខ័ណ្ឌការងាររបស់ក្រុមអ្នកសង្កេតការណ៍ឥណ្ឌូណេស៊ីនេះ ដែលប្រការនេះ នឹងផ្តល់ឱកាសអោយទាហានថៃបន្តការឈ្លានពានមកលើកម្ពុជាទៀត៕
No comments:
Post a Comment