នៅព្រឹកថ្ងៃអាទិត្យទី២៤មេសានេះ ទាហានថៃបានបើកការវាយប្រហារទ្រង់ទ្រាយធំបន្តទៀតមកលើកងទ័ពនិងជន ស៊ីវិលកម្ពុជា នៅតំបន់ប្រាសាទតាមាន់ និងតាក្របី ក្នុងខេត្តឧត្តរមានជ័យ។ ការវាយប្រហារថ្ងៃនេះក៏មានសភាពធ្ងន់ធ្ងរដូចកាលពីថ្ងៃសៅរ៍ម្សិលមិញដែរ គឺទាហានថៃបានប្រើប្រាស់គ្រាប់កាំភ្លើងធុនធំបាញ់ផ្លោងចូលក្នុងទឹកដី កម្ពុជា ជាពិសេស ចូលក្នុងគោលដៅប្រជាជនស៊ីវិល។ មានពលរដ្ឋភៀសសឹកមកប្រមូលផ្តុំគ្នាកាន់តែច្រើនក្នុងជំរំក្នុង ក្រុងសំរោង ទីរួមខេត្តឧត្តរមានជ័យ។ ក្រសួងការពារជាតិបានប្រកាសឱ្យដឹងថា មានទាហានកម្ពុជា៣នាក់បានស្លាប់ និង៦នាក់របួសក្នុងការប្រយុទ្ធគ្នា កាលពីថ្ងៃសៅរ៍។
ការវាយប្រហារថ្ងៃទី៣បានចាប់ផ្តើមនៅព្រឹកថ្ងៃអាទិត្យនេះ កាលពីវេលាម៉ោង៩និង៤០នាទី នៅចំណុចប្រាសាទតាមាន់ ហើយបានរាលដាលជាបន្តបន្ទាប់ដល់ចំណុចថ្មដូន និងតាក្របី តាមបណ្តោយព្រំដែនខេត្តឧត្តរមានជ័យ។ ក៏ដូចជាថ្ងៃម្សិលមិញដែរ ទាហានថៃបានបាញ់សន្ធាប់ដោយកាំភ្លើងផ្លោងចូលទឹកដីកម្ពុជាពេញមួយព្រឹក។ គ្រាប់ផ្លោងរាប់ពាន់គ្រាប់បានធ្លាក់ចូលក្នុងភូមិប្រជាពលរដ្ឋ និងបានបំផ្លាញផ្ទះសម្បែង និងទ្រព្យសម្បត្តិជនស៊ីវិលជាច្រើន។
យោងតាមសេចក្តីថ្លែងការណ៍របស់ក្រសួងការពារជាតិ ដែលចេញផ្សាយនៅថ្ងៃអាទិត្យនេះ កងទ័ពឈ្លានពានថៃបានផ្តើមវាយលុកយ៉ាងព្រៃផ្សៃ ដោយបាញ់កាំភ្លើងធំរាប់ពាន់គ្រាប់ចូលទឹកដីកម្ពុជា ជាពិសេស ចូលក្នុងតំបន់គោកមន ស្រុកបន្ទាយអំពិល ខេត្តឧត្តរមានជ័យ ដែលជាចំណុចមានជនស៊ីវិលជាច្រើនរស់នៅ។ សេចក្តីប្រកាសព័ត៌មានរបស់ក្រសួងការពារជាតិបន្តថា កងទ័ពថ្មើរជើងថៃក៏បានវាយលុក ប៉ុនប៉ងកាន់កាប់ប្រាសាទតាមាន់របស់កម្ពុជាផងដែរ។
ស្ថានភាពនេះបានធ្វើឱ្យពលរដ្ឋភៀសសឹករាប់ពាន់គ្រួសារបានចាកចេញពីភូមិកាន់តែច្រើនឡើងៗ ដោយសារព្រួយបារម្ភពីសុវត្ថិភាព។ ជំរំជនភៀសសឹកចំនួន៣ នៅក្នុងក្រុងសំរោង ទីរួមខេត្តឧត្តរមានជ័យ បានទទួលជនភៀសខ្លួនយ៉ាងកកកុញ នៅថ្ងៃអាទិត្យនេះ។ សូមបញ្ជាក់ថា ពីក្រុងសំរោង ទៅកាន់ច្រកព្រំដែនអូរស្មាច់ មានចម្ងាយប្រហែលជាង៤០គម។ គ្រាប់ផ្លោងរបស់ថៃ ដែលធ្លាក់ចូលជ្រៅមកក្នុងដីខ្មែរបានលាន់ឮយ៉ាងច្បាស់ដល់ក្រុងសំរោង ដែលជាជំរំជនភៀសសឹក។ លោកញ៉ឹម វណ្ណដា អនុប្រធានទី១នៃគណៈកម្មាធិការជាតិគ្រប់គ្រងគ្រោះមហន្តរាយបាននិយាយនៅថ្ងៃនេះថា អាជ្ញាធរកំពុងតែស្វែងរកទីតាំងថ្មី ដើម្បីបង្កើតជំរំជនភៀសសឹកផ្សេងទៀត ដែលមានសុវត្ថិភាពជាងនេះ។
នៅមិនទាន់មានសេចក្តីរាយការណ៍អំពីអ្នកស្លាប់ អ្នករបួស និងការខូចខាតទ្រព្យសម្បត្តិនៅឡើយទេ សម្រាប់ការវាយប្រហាររបស់ទាហានថៃ ក្នុងថ្ងៃទី៣នេះ ប៉ុន្តែ ក្រសួងការពារជាតិបានប្រកាសឱ្យដឹងថា ការប្រយុទ្ធគ្នាកាលពីថ្ងៃសៅរ៍ម្សិលមិញបានបណ្តាលឱ្យទាហានកម្ពុជា៣នាក់ស្លាប់ និង៦នាក់រងរបួស។ ដូច្នេះ គិតជាសរុប មកទល់ថ្ងៃម្សិលមិញ ក្នុងការប្រយុទ្ធគ្នាចុងក្រោយនេះ មានទាហានកម្ពុជាស្លាប់៦នាក់ និងរបួសជាង១០នាក់។ យ៉ាងណាក៏ដោយ ទាហានឈ្លានពានថៃមិនអាចចូលកាន់កាប់ទីតាំងណាមួយបានទេ។
សេចក្តីរាយការណ៍ពីសមរភូមិជួរមុខឱ្យដឹងថា ទោះបីជាថៃមានប្រៀបខាងសព្វាវុធ និងចំនួនទ័ពច្រើនលើសកម្ពុជាយ៉ាងខ្លាំងក៏ដោយ តែទាហានថៃបានស្លាប់ របួសនិងរត់ចោលជួរយ៉ាងច្រើននៅពេលប្រយុទ្ធ។ រីឯទាហានកម្ពុជានៅតែមានស្មារតីយ៉ាងរឹងមាំក្នុងការការពារទឹកដីរបស់ខ្លួនដដែល។
ព័ត៌មានចុងក្រោយ
ទាហានថៃនៅតែបន្តបាញ់ផ្លោងលើកម្ពុជា នៅវេលាម៉ោង៥ និង១៥នាទី ល្ងាចនេះ នៅតំបន់ប្រាសាទតាក្របី និងមានគ្រាប់ផ្លោងរប៉េះរប៉ោះមិនដាច់ នៅឯប្រាសាទតាមាន់ផងដែរ។
កងទ័ពកម្ពុជាបានចាប់ចារបុរសពីរនាក់ និងចារនារីពីរនាក់ រួមទាំងឆ្កែមួយក្បាលផង ដែលថៃបានប្រើប្រាស់ សម្រាប់ធ្វើចារកិច្ច ក្នុងមូលដ្ឋានកងទ័ពកម្ពុជា។ ចារនារីថៃទាំងពីរបានក្លែងខ្លួនជាមនុស្សឆ្កួត ប៉ុន្តែ ពួកគេត្រូវបានបំពាក់ដោយចិញ្ចៀន ដែលបង្កប់ដោយកាមេរ៉ាស្វ័យប្រវត្តិជាប់នឹងដៃ។ ចំណែកឯសត្វឆ្កែមួយក្បាល ដែលដើរចូលក្នុងមូលដ្ឋានទ័ពរបស់កម្ពុជានោះក៏មានបំពាក់ដោយកាមេរ៉ាស្វ័យប្រវត្តិនៅនឹង ក របស់វាដែរ។ ដោយឡែកជនសង្ស័យថា ជាចារបុរសពីរនាក់ទៀត ជាជនជាតិខ្មែរ ប៉ុន្តែ ចេះភាសាថៃ និងជាអ្នករកស៊ីឈើគ្រញូងជាមួយថៃ។ ពួកគេបានដើរចូលក្នុងមូលដ្ឋានកងទ័ពកម្ពុជា ក្នុងរបៀបជាអ្នកសុំទាន។ នេះបើយោងតាមការឱ្យដឹងពីសមរភូមិមុខ៕
RFI
No comments:
Post a Comment