មនុស្សប្រមាណជា១០% ដែលបរិភោគទឹកមិនគ្រាប់គ្រាន់ ជាជនរងគ្រោះនៃជំងឺគ្រួសក្នុងតំរងនោម បុរសទទួលរងគ្រោះខ្លាំងជាងស្ត្រីដល់ទៅទ្វេដង។ ជំងឺនេះនឹងបង្កឲ្យមានការឈឺចាប់យ៉ាងខ្លាំងជាញឹកញាប់។ ហើយបើអ្នកជំងឺណាធ្លាប់បានកើតជំងឺនេះម្តងហើយ នោះគាត់ងាយនឹងលាប់ឡើងវិញបានក្នុងរយៈពេល១០ឆ្នាំក្រោយ។ តើអ្វីទៅជាជំងឺគ្រួសក្នុងតំរងនោម ? គ្រួសនោះមានលក្ខណៈដូចម្តេច និងអ្វីជាបុព្វហេតុដែលបង្កឲ្យមានគ្រួសនេះ ? សូមអញ្ជើញស្តាប់ការពន្យល់បំភ្លឺរបស់លោកវេជ្ជបណ្ឌិត លឹម សុជន់ គ្រូពេទ្យឯកទេសជំងឺតំរងនោម តាមរយៈបទសម្ភាសន៍ជាមួយនឹងអៀង សុខម៉ិញ។
គ្រួសក្នុងតំរងនោម មានច្រើនប្រភេទណាស់ វាមានសភាពរឹងដូចជាគ្រួសធម្មតានៅខាងក្រៅដូច្នោះឯង។ គ្មានគ្រួសណាមួយដែលបង្កឡើងដោយសារធាតុតែមួយមុខទេ។ គ្រួសដែលគេជួបប្រទះញឹកញាប់ជាគេជាគ្រួសបង្កឡើងដោយសារធាតុ កាល់ស្យូម។ កាល់ស្យូមបូកជាមួយនឹងសារធាតុអុកសាលាដ កាល់ស្យូមជាមួយនឹងផូហ្វ័រ ឬផូស្វ័រជាមួយនឹងអាម៉ូញាក់ និងការបូកផ្សំជាច្រើនផ្សេងៗទៀត ...
មូលហេតុ
- កត្តាទីមួយ ៖ ការប្រតិបត្តិ។ គ្រួសវាបង្កឡើងដោយសារទឹកនោមរបស់យើងមានផ្ទុកទៅដោយសារធាតុមួយ ចំនួនដែលមិនរលាយ។ បើសិនយើងមានកំរិតទឹកនោមតិច- ទៅបត់ជើងតូចតិចតួចពេក ព្រោះតែបរិភោគទឹកតិចពេក នោះសារធាតុដែលបង្កជាកំហាប់ក្នុងទឹកនោម មានជាអាទិ៍ កាល់ស្យូម អុកសាលាដ អាស៊ីតអុយរិក ព្រមទាំងសារធាតុមួយចំនួនផ្សេងៗទៀត ក៏មានខ្ពស់ ដូច្នេះគ្រោះនៃការបង្កបង្កើតជាគ្រួសក៏មានច្រើនទៅតាមនោះ ដែរ។ និយាយឲ្យខ្លីស្រួលស្តាប់ បើទឹកនោមមានកំហាប់ខ្ពស់ គ្រោះមានគ្រួសក្នុងតំរងនោមក៏ខ្ពស់ដែរ។ សរុបសេចក្តីមក គឺការបរិភោគទឹកមិនគ្រប់គ្រាន់ជាកត្តាមួយដែលបង្កឲ្យមានគ្រួស ក្នុងតំរងនោម។
- កត្តាទីពីរ ៖ បញ្ហាបុគ្គល។ មានជំងឺរលាក ឬជំងឺផ្សេងទៀតនៅតំរងនោម នៅផ្លោកនោមញឹកញាប់ ក៏អាចប្រទាញឲ្យងាយជួបនឹងគ្រោះកើតជំងឺគ្រួសក្នុងតំរងនោមដែរ។ បុគ្គលខ្លះទៀត គាត់មានសំណាងមិនល្អ ធម្មជាតិបានបង្កើតគាត់មកជាមួយនឹងទំរង់មិនធម្មតាធ្វើឲ្យគាត់ងាយ នឹងកើតគ្រួសនេះ។
រោគសញ្ញា
គ្រួសក្នុង តំរងនោមបានបង្កឲ្យមានការឈឺចុកចាប់ យ៉ាងខ្លាំង មិនអាចទ្រាំបាន នៅម្តុំចង្កេះ តែម្ខាងទេ និងឈឺពោះសំយ៉ុងចុះមកប្រដាប់ភេទ។ ការឈឺចុកចាប់នេះបណ្តាលមកពីគ្រួសនៅក្នុងតំរងនោម វាធ្លាក់ ឬចេញមកស្ទះនៅតាមបង្ហួរនោម ដោយប្រការណាមួយ ជួនកាលដោយសារការធ្វើដំណើរឆ្ងាយ មិនបរិភោគទឹកគ្រប់គ្រាន់ អុក រលាក់។ នៅពេលបត់ជើង អ្នកជំងឺអាចមានទឹកនោមលាយឈាមក៏មាន។ ប៉ុន្តែពេលខ្លះគ្រួសក្នុងតំរងនោម មិនបានផ្តល់ជារោគសញ្ញាអ្វីឡើយ ជាពិសេសបើគ្រួសស្ថិននៅក្នុងតំរងនោមតែម្តង។ គេអាចដឹងបាន ថាមានគ្រួស តាមរយៈការថតឆ្លុះ ឬ ថតអេកូ។ ក្នុងករណី គ្រួសក្នុងតំរងនោម ដែលគ្មានផ្តល់រោគសញ្ញានេះ គ្រោះថា្នក់អាចមានលក្ខណៈធ្ងន់ធ្ងរខ្លាំង ព្រោះគ្រួសវាចេះតែរីកដុះធំៗឡើងៗ នោះនឹងធ្វើឲ្យអ្នកជំងឺមានតំរងនោមខ្សោយ។ គ្រួសធំពេកមិនអាចចេញតាមបង្ហួរនោមកើត មធ្យោបាយមានតែមួយគឺត្រូវធ្វើការវះកាត់ ហើយពេលខ្លះត្រូវកាត់យកតំរងនោមនោះចេញតែម្តងក៏មាន។
ទឹកស្អាត
ទឹក មានចំណែកខ្លាំងណាស់ក្នុងការជួយបង្ការកុំឲ្យមានបញ្ហាគ្រួស ក្នុងតំរងនោម។ ដូច្នេះទឹកសំរាប់បរិភោគ គឺជា “ទឹកស្អាត”។ ព្រោះ ទឹកសុទ្ធដែលដាក់លក់នៅលើទីផ្សារ ទឹកខ្លះ មានសារធាតុអ៊ីយ៉ុងច្រើន ដូចជា កាល់ស្យូម ច្រើន ទឹកប្រភេទនេះ ត្រូវប្រើតែចំពោះបុគ្គលណាដែលខ្វះជាតិកាល់ស្យូមប៉ុណ្ណោះ។ ឯចំណែកទឹកអណ្តូង ដែលប្រជាជនខ្មែរភាគច្រើនប្រើប្រាស់វិញ ជាទឹកដែលសំបូរទៅដោយសារធាតុរឹងច្រើន ដូចជាកាល់ស្យូម កាល់កែរ។ បើទឹកនោះសំបូរទៅដោយជាតិកាល់ស្យូម នោះនឹងធ្វើងាយរងគ្រោះកើតគ្រួសក្នុងតំរងនោមដែរ។
ផលវិបាកដែលបង្កឡើងដោយគ្រួស
- មានការឈឺចុកចាប់យ៉ាងខ្លាំងមិនអាចទ្រាំបាន ព្រោះតែគ្រួសចេញមកក្រៅ គាំងនៅតាមបង្ហួរនោម។
- ខូចតំរងនោម។ គ្រួសខ្លះ នឹងធ្វើឲ្យស្ទះបង្ហួរនោម នោមលែងចេញ ឬចេញបានតែបន្តិចបន្តួច ធ្វើឲ្យទឹកនោមឡើងចាល់ពេញតំរងនោម ពេលនោះតំរងនោមនឹងឡើងប៉ោង។ យូរៗទៅ តំរងនោមនោះនឹងចុះខ្សោយ ហើយបើគ្មានការព្យាបាលទាន់ពេលវេលាទេ អ្នកជំងឺនឹងអាចជួបគ្រោះថ្នាក់ខូចតំរងនោមម្ខាង។ ការខូចតំរងនោមដែលពេលខ្លះគ្រូពេទ្យត្រូវតែធ្វើវះកាត់ចោលតែ ម្តង។
No comments:
Post a Comment