កងទ័ពកូរ៉េខាងត្បូងនឹងធ្វើសមយុទ្ធ ឬលំហាត់សឹករបស់ខ្លួននៅសមុទ្ទលឿង នៅលើកោះដែលត្រូវបានកូរ៉េខាងជើង វាយប្រហារដោយគ្រាប់កាំភ្លើងធំ នៅខែវិច្ឆិកាមុន ទោះបីជាមានការគំរាមរបស់ព្យុងយ៉ាងថា នឹងធ្វើការសងសឹកតបវិញក៏ដោយ - នេះជាការអះអាងរបស់ក្រសួងការពារជាតិកូរ៉េខាងត្បូង នៅថ្ងៃសៅរ៍ទី ១៨ ធ្នូនេះ។
បទអន្តរាគមន៍របស់ វីនស្តុន រតនា
កងទ័ពកូរ៉េខាងជើងបានព្រមានប្រាប់ថា ការវាយសំពងជាលើកទីពីរ និងទីបីដើម្បីការពារខ្លួននឹងត្រូវធ្វើ ប្រសិនបើកូរ៉េខាងត្បូងធ្វើលំហាត់សឹករបស់ខ្លួនដោយបាញ់គ្រាប់កាំភ្លើងមែនទែន បន្ទាប់បីការវាយសំពងជាលើកទីមួយ នៅថ្ងៃទី២៣វិច្ឆិកា នៅលើកោះកូរ៉េខាងត្បូង យុងព្យុង។
ការវាយសំពងថ្មីនឹងមានកម្លាំងហើយនឹងទំហំធំជាងកាលនៅថ្ងៃ២៣វិច្ឆិកា ទៅទៀត។
កូរ៉េខាងជើង ក៏បានព្រមានប្រាប់ដែរថា “ដោយហេតុតែឥរិយាបថបង្កសង្គ្រាម និងគ្មានស្មារតីទទួលខុសត្រូវរបស់កូរ៉េខាងត្បូង បញ្ហាពុំមែនស្ថិតនៅត្រង់តើនឹងមានសន្តិភាព ឬសង្គ្រាមនៅឧបទ្វីបកូរ៉េឬទេ ប៉ុន្តែស្ថិតនៅត្រង់សង្គ្រាមនឹងផ្ទុះឡើងនៅពេលណា?”។ “ប្រសិនបើសង្គ្រាមមួយនឹងផ្ទុះឡើង ការនេះនឹងនាំទៅកាន់អធិករណ៍នុយក្លេអែរ ដែលនឹងពុំកំរិតតែនៅឧបទ្វីបកូរ៉េនោះទេ”។
កងទ័ពកូរ៉េខាងត្បូងបានប្រកាសពីថ្ងៃព្រហស្បតិ៍ថា ខ្លួននឹងធ្វើលំហាត់សឹកក្នុងចន្លោះពេលពីថ្ងៃសៅរ៍ ទៅថ្ងៃអង្គារសប្តាហ៍ក្រោយដោយអាស្រ័យនឹងអាកាសធាតុ នូវលំហាត់សឹកដោយបាញ់គ្រាប់មែនទែន នៅលើកោះយុងព្យុង។ គឺជាលំហាត់សឹកលើកទីមួយ ចាប់តាំងពីការបាញ់គ្រាប់កាំភ្លើងធំរបស់កូរ៉េខាងជើង នៅថ្ងៃទី២៣ វិច្ឆិកា មុន ដែលបានបណ្តាលឲ្យស្លាប់ជនជាតិកូរ៉េខាងត្បូង៤នាក់ និងរបួស១៨នាក់ទៀត និងបណ្តាលឲ្យសហគមន៍អន្តរជាតិមានកំហឹងក្រេវក្រោធ។
ក្រសួងការពារជាតិកូរ៉េខាងត្បូង បានថ្លែងថា "យើងគ្មានត្រូវការបញ្ចេញប្រតិកម្មតបចំពោះការគំរាមសូម្បីបន្តិចបន្តួចក្តី និងសេចក្តីថ្លែងការណ៍ខ្វះវិចារណញ្ញាណរបស់កូរ៉េខាងជើងទេ"។ គ្មានការផ្លាស់ប្តូរទេ នៅក្នុងដំណើរការលំហាត់សឹក។ លំហាត់សឹកប្រហែលអាចនឹងត្រូវលើកពេលទៅធ្វើនៅថ្ងៃក្រោយ ប្រសិនបើអាកាសធាតុមិនល្អ។
អ្នកនាំពាក្យនៃក្រសួងការបរទេសអាមេរិកាំង លោក Philip Crowley បានថ្លែងម្សិលមិញ ថ្ងៃសុក្រ១៧ធ្នូ ថាសមយុទ្ធ ឬលំហាត់សឹកគ្រោងធ្វើនៅកូរ៉េខាងត្បូង មិនគំរាមកូរ៉េខាងជើងទេ។ ហេតុនេះ ព្យុងយ៉ាងពុំត្រូវយកវាធ្វើជាលេស ដើម្បី "បង្ករឿងហេតុថ្មីៗឡើយ"។
ប្រទេសនីមួយៗមានសិទ្ធិហាត់ហ្វឹកហ្វឺនកងទ័ពរបស់ខ្លួន ដើម្បីតម្រូវការនៃកិច្ចការពារប្រទេសជាតិខ្លួន។ ព្យុងយ៉ាងពុំត្រូវយកសមយុទ្ធនេះ ធ្វើជាលេសនិយាយដោះសា ដើម្បីបង្ករឿងហេតុថ្មីៗទៀតនោះឡើយ។
ស្របតាមលោកឧត្តមសេនីយ James Cartwright ជានាយសេនាធិការដ្ឋានរងអាមេរិកាំង “អ្វីដែលធ្វើឲ្យយើងព្រួយបារម្ភមែនទែន គឺជាការយល់ពុំច្បាស់ ឬក៏កូរ៉េខាងជើងចាត់ទុកជាឱកាសល្អមួយ ដើម្បីទាញយកចំណេញនឹងឆ្លើយតបចំពោះការបាញ់គ្រាប់មែនទែន។ ការនេះអាចបណ្តាលឲ្យមានប្រតិកម្មតបតគ្នារវាងព្យុងយ៉ាង និងសេអ៊ូល។
នៅឱកាសបំពេញទស្សនកិច្ចជាឯកជន នៅព្យុងយ៉ាង នៅថ្ងៃព្រហស្បតិ៍ លោកទេសាភិបាលរដ្ឋ Nouveau Mexique Bill Richardson បានអំពាវនាវក្រុមអ្នកអ្នកទទួលខុសត្រូវកូរ៉េខាងជើង ឲ្យខំទប់ចិត្តទប់ថ្លើម ដោយសុំឲ្យកូរ៉េខាងជើងទុកឲ្យអ្នកជិតខាងខាងត្បូងរបស់ខ្លួន ធ្វើលំហាត់សឹកដោយបាញ់គ្រាប់មែនទែន នៅលើកោះយុងព្យុងរបស់គេ។ លោក Richardson បាននិយាយម៉ឺងម៉ាត់ខ្លាំងណាស់ជាមួយក្រុម អ្នកទទួលខុសត្រូវនៃក្រសួងការបរទេសកូរ៉េខាងជើង។
រុស្ស៊ីសុំឲ្យកូរ៉េខាងត្បូងលះបង់លំហាត់សឹកដោយកាំភ្លើងធំ ដើម្បីចៀសវាងកំណើនភាពតានតឹងជាមួយកូរ៉េខាងជើង។ រុស្ស៊ីអំពាវនាវឲ្យមានភាពធូរស្រាល នៅក្នុងទំនាក់ទំនងរវាងកូរ៉េទាំងពីរ និងឲ្យដោះស្រាយគ្រប់តែរឿងជម្លោះ តាមផ្លូវនយោបាយ និងការទូត។ ម៉ូស្គូក៏ដូចជាប៉េកាំងអ៊ីចឹងដែរ មានទំនាក់ទំនងជាមួយរបបព្យុងយ៉ាង តាំងពីជំនាន់សូវៀតមកម្ល៉េះ ហើយនៅសប្តាហ៍នេះបានទទួលលោករដ្ឋមន្ត្រីក្រសួងការបរទេសកូរ៉េខាងជើង Pak Ui Chun ដែលបំពេញទស្សនកិច្ច នៅម៉ូស្គូ។ លោកអនុរដ្ឋមន្ត្រីក្រសួងការបរទេសកូរ៉េខាងត្បូង Wi Sung-lac ក៏ត្រូវទៅកាន់ម៉ូស្គូដែរនៅសប្តាហ៍នេះ។
នៅឱកាសសន្និសីទសារព័ត៌មានមួយនៅថ្ងៃសុក្រម្សិលមិញ នៅ New York លោកអគ្គលេខាធិការអង្គការសហប្រជាជាតិ បាន គីមូន បានសំដែងក្តីព្រួយបារម្ភកាន់តែខ្លាំងឡើង ចំពោះសភាពការណ៍នៅឧបទ្វីបកូរ៉េ ដោយសុំឲ្យកូរ៉េខាងជើងមានការអត់ធ្មត់ ខំទប់ចិត្ត ទប់ថ្លើម។ យើងសាកល្បងរិះរកមធ្យោបាយ ដើម្បីកសាងសន្តិភាពនិងសន្តិសុខ ដោយការជួបសន្ទនា គ្នា និងដោយសហប្រតិបត្តិការ។ លោក បាន គីមូន បានរំលឹកប្រាប់ថា ការបាញ់គ្រាប់កាំភ្លើងធំរបស់កូរ៉េខាងជើង ទៅលើកោះកូរ៉េខាងត្បូង យុងព្យុង នៅចុងខែវិច្ឆិកាមុន គឺជា “ការបង្ករឿងហេតុដ៏ធ្ងន់ធ្ងរបំផុតមួយ ចាប់តាំងពីចប់សង្គ្រាមនៅកូរ៉េ” នៅឆ្នាំ១៩៥៣មក៕
By rfi...
No comments:
Post a Comment