Friday, January 28, 2011

បញ្ហាអតិផរណា​គំរាមដល់​សន្ទុះ​កំណើន​សេដ្ឋកិច្ច​កូរ៉េ​ខាងត្បូង​


លោក​ប្រធានាធិបតី​​កូរ៉េខាងត្បូង​​ Lee Myung Bak

សេដ្ឋកិច្ច​កូរ៉េ​ខាងត្បូង​ដែល​ស្គាល់​សន្ទុះ​កើនឡើង​ខ្លាំង​ក៏​ ដោយសារតែ​មាន​ការ​ទិញដូរ​ហូប​ចុក​ផ្ទៃក្នុង​និង​ការ​នាំទំនិញ​ចេញទៅលក់​ក្រៅ​ ប្រទេស​មាន​សន្ទុះ​ខ្លាំងក្លា​ ​ ទោះបីជា​នៅឆមាស​ទី២​ឆ្នាំ២០១០​បាន​ស្គាល់​ការធ្លាក់​ស្រុតចុះ​បន្តិច​ទៅវិញ​ ក្តី។​ សម្រាប់​ឆ្នាំ២០១០​ទាំងមូល​ ​ សេដ្ឋកិច្ច​​កូរ៉េ​ខាងត្បូង​បាន​ស្ទុះកើន​ឡើង​៦,១%​ដែលជា​កម្រិត​មួយ​ដ៏សែន​ ខ្ពស់​ពុំដែល​កើតមាន​ចាប់​តាំងពី​ឆ្នាំ២០០២​មក។​ ក៏​ប៉ុន្តែ​បញ្ហា​អតិផរណា​អាច​នឹង​គំរាម​ដល់​កំណើន​នៃ​សេដ្ឋកិច្ច​កូរ៉េ​ ខាងត្បូង។



ក្រោយពី​បាន​ឋិត​នៅ​ក្នុង​ចំណោម​ប្រទេស​ដែលបាន​រើ​ខ្លួន​ចេញផុត​ពី​វិបត្តិ​សេដ្ឋកិច្ច​និង​វិបត្តិ​ហិរញ្ញវត្ថុ​នៃ​ឆ្នាំ២០០៨​មុនគេ​ ​ អត្រា​នៃ​កំណើន​ផលិតផល​សរុប​ក្នុង​ប្រទេស​កូរ៉េ​ខាងត្បូង​បាន​កើនឡើង​០,៥%​នៅ​ត្រីមាស​ទី៤​ឆ្នាំ២០១០​បើ​ប្រៀប​ផ្ទឹម​ទៅនឹង​ត្រីមាស​មុន។​ កំណើន​នេះ​ជា​កំណើន​ដ៏​តិចទាប​ បើ​ប្រៀបផ្ទឹម​ទៅ​ត្រីមាស​ទី១​និង​ត្រីមាស​ទី២​ឆ្នាំ២០១០​ដែល​មាន​ដល់ទៅ​២,១%និង​១,៤%។


លទ្ធផល​ដ៏​ល្អ​ដែល​សម្រេច​បាន​ដោយ​ប្រទេស​មហាអំណាច​សេដ្ឋកិច្ច​ទី៤​នៅ​អាស៊ី​ឬ​ ប្រទេស​មហាអំណាច​សេដ្ឋកិច្ច​ទី១៣​​ពិភពលោក​ដែល​មាន​ប្រាក់​បំណុល​ពុំ​លើស​ពី​២៤%​នៃ​ផលិត​ផល​​​ដុល​ក្នុង​ប្រទេស​ឡើយ។​ ហើយ​អត្រា​នៃ​អ្នក​ឥត​ការងារ​ធ្វើ​ទៀតសោត​ក៏​នៅ​តិចទាប​ ពោលគឺ​មានតែ​៣,៧%​ប៉ុណ្ណោះ​នៃ​ចំនួន​ប្រជាជន​សកម្ម​សរុប។​ ទាំងនេះ​ក៏​ដោយសារ​តែ​ការនាំ​ទំនិញ​កូរ៉េ​ខាងត្បូង​ចេញ​ទៅលក់​ក្រៅ​ប្រទេស​មាន​ថាមពល​ខ្លាំងក្លា​ ជាពិសេស​ផលិតផល​អេឡេចត្រូនិក​និង​រថយន្ត​កូរ៉េ​ខាងត្បូង។

ការនាំ​ចេញនេះ​មាន​សន្ទុះ​ខ្លាំង​ ក៏​ដោយសារ​តែ​តម្រូវការ​ពិភពលោក​មាន​ថាមពល​ខ្លាំង​ ​ ជាពិសេស​ពី​សំណាក់​ប្រទេស​ចិន​ដែល​ជា​អ្នក​ស្រូប​ទិញ​ផលិតផល​កូរ៉េ​ខាងត្បូង​ដល់ទៅ​ប្រមាណ​១/៤​នៃ​ការនាំ​ចេញ​សរុប​របស់​កូរ៉េ​ខាងត្បូង។​ ហើយ​កត្តា​មួយ​ទៀត​ដែល​ធ្វើឲ្យ​ការនាំ​ចេញ​របស់​កូរ៉េ​ខាងត្បូង​មាន​សន្ទុះ​ខ្លាំង​គឺ​តម្លៃ​រូបិយប័ណ្ណ​កូរ៉េ​ខាងត្បូង​ពោលគឺ​ប្រាក់​Won នេះឯង​តែ​ម្តង​ដែល​មាន​តម្លៃ​ថោក​ដែល​ជា​កត្តា​មួយ​ដ៏​សំខាន់​ក្នុង​ការ​ជួយ​រុញច្រាន​ការនាំ​ចេញ​របស់​កូរ៉េ​ខាងត្បូង​ឲ្យ​មាន​សន្ទុះ​ខ្លាំង។

កត្តា​វិជ្ជមាន​មួយ​ទៀត​សម្រាប់​សេដ្ឋកិច្ច​កូរ៉េ​ខាងត្បូង​គឺ​ការ​ស្ទុះ​កើនឡើង​ក្នុង​ការ​ទិញដូរ​ហូប​ចុក​ក្នុង​ប្រទេស​ដែល​បាន​កើនឡើង​០,៣%​នៅ​ត្រីមាស​ទី៤​ឆ្នាំ២០១០​ ​ ហើយ​បាន​កើន​ឡើង​៧%​សម្រាប់​ឆ្នាំ២០១០​ទាំងមូល​ ​ ក្រោយពី​បាន​ស្គាល់​ការ​ដើរថយ​ក្រោយ​-៣,៨%​នៅ​ឆ្នាំ២០០៩។​ ហើយ​នៅ​ឆ្នាំ២០១១​នេះ​ ​ អត្រា​នៃ​កំណើន​សេដ្ឋកិច្ច​កូរ៉េ​ខាងត្បូង​អាច​ឋិតនៅ​ចន្លោះ​៤,៥%​និង​៥%។

ទស្សនវិស័យ​សេដ្ឋកិច្ច​កូរ៉េ​​ខាងត្បូង​នេះ​ក៏​ចង​ភ្ជាប់​មក​ជាមួយ​នូវ​ក្តីបារម្ភ​កាន់តែ​ខ្លាំងឡើងៗ​ ​ ដោយ​ហេតុតែ​មាន​បញ្ហា​ទំនិញ​ឡើងថ្លៃ​ដែល​អាច​គំរាម​ដល់​សន្ទុះ​កំណើន​សេដ្ឋកិច្ច​នៃ​ប្រទេស​កូរ៉េ​ខាងត្បូង។

អត្រា​អតិផរណា​ដែល​មាន​២,៩%​នៅ​ឆ្នាំ២០១០ក៏​ដោយ​ហេតុ​តែ​ការទិញ​ដូរ​ហូបចុក​ផ្ទៃក្នុង​មាន​សន្ទុះ​ខ្លាំង​ហើយក៏​ដោយហេតុ​តែ​តម្លៃ​នៃ​វត្ថុធាតុ​ដើម​បានកើន​ឡើង​ថ្លៃ​ខ្លាំង​ ​ ក៏​ដូច​គ្នា​អ៊ីចឹងដែរ​សម្រាប់​តម្លៃ​ចំណី​អាហារ​ដែល​បាន​កើន​ឡើង​ថ្លៃ​២១,៣%​នៅ​ឆ្នាំ២០១០​ពីព្រោះ​តែ​ការ​ប្រមូល​ដំណាំ​ភោគផល​ពុំ​បាន​ល្អ​ប្រសើរ​ ​ ​ ហើយ​និង​ជ្រូក​មាន​​ជម្ងឺ​ពង​បែក​ក្នុង​មាត់​ដែល​បាន​នាំ​ឲ្យ​គេ​សម្លាប់​សត្វ​ជ្រូក​ចោល​អស់​ជិត​៣លាន​ក្បាល​ដែល​ស្មើនឹង​១៥%​នៃ​ចំនួន​សត្វជ្រូក​សរុប​ដែល​ចិញ្ចឹម​នៅ​ប្រទេស​កូរ៉េ​ខាងត្បូង។

តម្លៃ​ទំនិញ​ឡើង​ថ្លៃ​ខ្លាំង​ជាពិសេស​តម្លៃ​ចំណី​អាហារ​បាន​ធ្វើឲ្យ​ប៉ះពាល់​យ៉ាងខ្លាំង​ដល់​ប្រជាជន​កូរ៉េ​ខាងត្បូង​ដែល​មាន​ប្រាក់​ចំណូល​ខ្សត់ខ្សោយ។​ ដូច្នេះហើយ​ ​ បានជា​ក្រសួង​ហិរញ្ញវត្ថុ​និង​សេដ្ឋកិច្ច​កូរ៉េ​ខាងត្បូង​បាន​ចាត់​វិធានការ​ធ្វើ​សង្គ្រាម​ប្រយុទ្ធ​ប្រឆាំង​នឹង​បញ្ហា​ទំនិញ​ឡើងថ្លៃ​ ​ ដោយបាន​ដាក់​កំហិត​ឲ្យ​តម្លៃ​ភ្លើង​អគ្គិសនី​និង​តម្លៃ​ឧស្ម័ន​ឲ្យ​ឋិត​នៅ​នឹង​ថ្កល់​មួយ​រយៈពេល។​ ចំណែកឯ​តម្លៃ​សម្រាប់​ចុះឈ្មោះ​រៀន​នៅ​មហាវិទ្យាល័យ​វិញ​ក៏​ដូច​គ្នា​អ៊ីចឹងដែរ។

ដោយយល់​ដឹង​ពី​គ្រោះ​ថ្នាក់​ពី​បញ្ហា​ទំនិញ​ឡើងថ្លៃ​ដែល​អាច​គំរាម​ដល់​សន្ទុះ​កំណើន​សេដ្ឋកិច្ច​ ​ ធនាគារ​កណ្តាល​កូរ៉េ​ខាងត្បូង​បាន​សម្រេច​កាលពី​ថ្ងៃទី​១៣មករា​កន្លងទៅ​ធ្វើការ​ដំឡើង​អត្រា​ការប្រាក់​នាំមុខ​របស់​គេ​ប្រមាណ​០,២៥ពិន្ទុ​ឲ្យ​កើនឡើង​ដល់​២,៧៥%​ដែលជា​ការ​ដំឡើង​លើកទី៣​ក្នុងរយៈកាល​តែ​៦ខែ​ប៉ុណ្ណោះ។សេចក្តី​សម្រេច​ចិត្ត​របស់​ធនាគារ​កណ្តាល​កូរ៉េ​ខាងត្បូង​នេះ​បាន​ទទួល​ការ​យល់ស្រប​ពី​សំណាក់​អ្នកជំនាញការ។

សូមបញ្ជាក់ថា​ ​ លោក​ប្រធានាធិបតី​កូរ៉េខាងត្បូង​Lee Myung Bak បាន​សន្យាថា​ ​ នឹង​រក្សា​ឲ្យ​អត្រា​អតិផរណា​ឋិត​នៅ​រវាង​៣%​នៅ​ឆ្នាំ២០១១នេះ៕
Link : http://www.khmer.rfi.fr/korea/20110128-បញ្ហាអតិផរណា%E2%80%8Bគំរាមដល់%E2%80%8Bសន្ទុះ%E2%80%8Bកំណើន%E2%80%8Bសេដ្ឋកិច្ច%E2%80%8Bកូរ៉េ%E2%80%8Bខាងត្បូង%E2%80%8B

No comments:

Post a Comment