Tuesday, January 25, 2011

ជំងឺ​​រាតត្បាត​ថ្មីៗ​​គំរាម​​តំបន់​​អាស៊ីអាគ្នេយ៍

ជំងឺ​ថ្មីៗ ដែល​ខ្លះ​អាច​ក្លាយ​ទៅ​ជា​ជំងឺ​រាតត្បាត កំពុង​តែ​លេច​ចេញ​មក​គំរាម​កំហែង​តំបន់​អាស៊ី​អាគ្នេយ៍។ នេះ​បើ​តាម​ការ​សិក្សា​មួយ​ចេញ​ផ្សាយ​នៅ​ថ្ងៃ​អង្គារ​ទី ២៥​មករា នេះ​ពី​ទីក្រុង​បាងកក។ ការ​ឡើង​កម្តៅ​នៃ​ភព​ផែនដី ជា​មូល​ហេតុ​មួយ​ ក្នុង​ចំណោម​កត្តា​ជាច្រើន​​ដែល​​ជំរុញ​ឲ្យ​តំបន់​ជួប​​នឹង​ជំងឺរាតត្បាត​ថ្មីៗ​នេះ។

បច្ចុប្បន្ន​ មាន​ប្រជាជន​ប្រមាណ​ជាង​៦០០​លាន​នាក់ រស់​នៅ​ អាស៊ី​អាគ្នេយ៍ ​ទំនង​ជា​តំបន់​មួយ​ដែល​ងា​យ​នឹង​ទទួល​រងគ្រោះ​ពី​​ជំងឺ​ឆ្លង និង​ជំងឺថ្មីៗ​ទៀត​ណាស់។ ជំងឺ​ឆ្លង​ដែល​អាច​មានសក្តានុពល​ក្លាយ​ជា​ជំងឺ​រាត​ត្បាត។ ជា​ពិសេស​ជំងឺ​ឆ្លង​ពី​សត្វ​ទៅ​​មនុស្ស​ ព្រោះតែ​មនុស្ស​យើង​រស់​នៅ​ច្របូល​ច្របល់​​នឹង​សត្វ​​ខ្លាំង​ពេក។ ​នេះ​បើ​តាម​របាយការណ៍​របស់​ទិនានុប្បវត្តិ​វេជ្ជសាស្ត្រ​ The Lancet។

សូម​បញ្ជាក់​ថា​ ការ​ព្រួយ​បារម្ភ​បាន​រីក​ធំធាត់​ជា​លំដាប់​តាំង​ពី​ឆ្នាំ ២០០៣​មក ឆ្នាំ​ដែល​មាន​លេច​ជំងឺ​ផ្លូវ​ដង្ហើមធ្ងន់ធ្ងរ​ ​SRAS។ ជំងឺ​SRAS ដែល​កាលណោះ​បានសម្លាប់​ជីវិត​មនុស្ស​អស់​ជិត ៨០០​ ​នាក់ នៅ​លើ​ពិភពលោក។ បន្ទាប់​មក​ គឺ​ការ​រាត​ត្បាត​នៃ​ជំងឺ​គ្រុន​ផ្តាសាយ​បក្សី។

បើ​តាម​The Lancet ដដែល កំណើន​ប្រជាជន​ ការ​ធ្វើ​បន្លាស់​​ទី ការ​បង្កបង្កើនផល​កសិកម្ម​ និង​​ចិញ្ចឹម​សត្វ​កាន់​តែ​ច្រើន ការ​កាប់​បំផ្លាញ​ព្រៃ​ឈើ និង​ជា​ពិសេស​ ការ​ឡើង​កម្តៅ​នៃ​ភពផែនដី អាច​ចាត់​ទុក​ថា​បុព្វហេតុ​មួយ​ងាយ​នឹង​បង្ក​ឲ្យ​មាន​ការ​រីក​រាលដាល​នៃ​ជំងឺ​ឆ្លង​លេច​ឡើង​នៅ​ក្នុង​តំបន់។ អាកាសធាតុ​កាន់​តែ​ក្តៅ​ បូក​ជាមួយ​​ទឹក​ភ្លៀង​​ វា​កាន់​តែ​អនុគ្រោះ​ដល់​ពពួក​សត្វល្អិត និង​មូស​។

ដូច្នេះ​ដើម្បី​ប្រយុទ្ធ​ប្រឆាំង​​និង​ការ​ពារ​សុខភាព​សាធារណៈ​ គឺ​ទាមទារ​ការ​តាមដាន។ អ្នក​ស្រាវជ្រាវ​បាន​ទទូច​សុំ​ឲ្យ​ប្រទេស​ក្នុង​តំបន់​ទាំង​១០​​ (ឥណ្ឌូនេស៊ី ហ្វីលីព្វីន ឡាវ ប្រ៊ុយណេ ម៉ាលេស៊ី ភូមា សិង្ហបុរី កម្ពុជា ថៃ និង​វៀតណាម) ដំឡើង​កំរិត​រៀប​ចំ​ប្រុង​ប្រៀប​ឲ្យ​បាន​ប្រសើរ​ឡើង។ កង្វះ​ព័ត៌មាន​​ទាក់ទង​នឹង​ជំងឺ​រាតត្បាត​ ដែល​តែង​កើត​មាន​ជា​ទូទៅ​នៅ​អាស៊ីអាគ្នេយ៍​ រំខាន​យ៉ាង​ខ្លាំង​ដល់​ការ​ការពារ​បង្ការ​ជាមុន។

ទន្ទឹមនឹង​ជំងឺ​ឆ្លង​រាតត្បាត​នេះ អ្នក​ស្រាវជ្រាវ​ក៏​បាន​អំពាវ​នាវ​ឲ្យ​តំបន់​ចាត់​វិធានការ​ជាបន្ទាន់​ប្រឆាំង​នឹង​​​ជំងឺ​មហារីក ព្រោះ​វា​​ជាភា្នក់ងារ​សម្លាប់​ជីវិត​មនុស្ស​ដល់​ទៅ​៦០%៕
Link : http://www.khmer.rfi.fr/asia/20110125-ជំងឺ%E2%80%8B%E2%80%8Bរាតត្បាត%E2%80%8Bថ្មីៗ%E2%80%8B%E2%80%8Bគំរាម%E2%80%8B%E2%80%8Bតំបន់%E2%80%8B%E2%80%8Bអាស៊ីអាគ្នេយ៍

No comments:

Post a Comment