តំណាងរាស្រ្តកូរ៉េខាងត្បូងបង្ហោះខិត្តប័ណ្ណប្រឆាំងរបបដឹកនាំកូរ៉េខាងជើង
តើខ្យល់នៃការបះបោរដែលបក់ទៅលើពិភពអារ៉ាបអាចនឹងទៅដល់កូរ៉េខាងជើងឬទេ?ទោះជាយ៉ាងណាក្តី -នេះជាសេចក្តីប៉ងប្រាថ្នាខ្លាំងណាស់របស់កូរ៉េខាងត្បូងដែលចង់ប្រើព្រឹត្តិការណ៍នៅទុយនីស៊ី នៅអេហ្ស៊ីបនិងឥឡូវនៅលីប៊ី ដើម្បីធ្វើ” សង្គ្រាមចិត្តសាស្ត្រ “សំដៅប្រឆាំងនឹងរបបផ្តាច់ការកូរ៉េខាងជើង។
“ រាល់របបផ្តាច់ការត្រូវតែស្រុតរលំ “-នេះហើយជាពាក្យពេចន៍នៅលើខិត្តប័ណ្ណចំនួន២លាន៤សែនសន្លឹកដែលកងទ័ពកូរ៉េខាងត្បូងបានផ្ញើទៅកូរ៉េខាងជើង ចាប់ពីដើមខែនេះមក។ ខិត្តប័ណ្ណដែលជម្រាបប្រាប់បណ្តាជនកូរ៉េខាងជើងឱ្យដឹងអំពីការបះបោរនាពេលថ្មីៗដែលកំពុងតែបោសសម្អាតពិភពអារ៉ាប។
ស្របតាមអ្នកតំណាងរាស្ត្រកូរ៉េខាងត្បូងដែលបានបង្ហើបប្រាប់ឱ្យដឹងអំពីសង្គ្រាមចិត្តសាស្ត្រនេះ ខិត្តប័ណ្ណទាំងនេះត្រូវបានផ្ញើតាមគោមហោះកាត់ពីលើព្រំដែនខ័ណ្ឌចែកប្រទេសកូរ៉េទាំងពីរ។។គោមហោះដែលក៏មានផ្ទុកទាំងចំណីអាហារ សម្លៀកបំពាក់កក់ក្តៅ ថ្នាំដុសធ្មេញនិងជាពិសេសវិទ្យុ ។
ពីព្រោះកូរ៉េខាងជើងត្រូវគេចាត់ទុកជាប្រទេសមួយបិទជិតស្លុងចំពោះពិភពលោក។បណ្តាញអាំងទែរណេតត្រូវរបបផ្តាច់ការហាមប្រាម។បណ្តាជនកូរ៉េខាងជើងត្រូវគេបង្ខាំងមិនឱ្យស្តាប់ឮរាល់ព័ត៌មានមកពីអាហ្វ្រិកខាងជើង ដោយហេតុតែរបបផ្តាច់ការមិនចង់ឃើញប្រជាជនខ្លួនយកតម្រាប់តាមគេ។
ប៉ុន្តែនេះហើយជាសេចក្តីប៉ងប្រាថ្នានៅកូរ៉េខាងត្បូងរបស់សកម្មជនការពារសិទ្ធិមនុស្សដែលរមែងផ្ញើជារឿយៗទៅកាន់កូរ៉េខាងជើងតាមរយៈគោមហោះនូវរូបថតនៃបដិវត្តន៍នៅប្រទេសទុយនីស៊ីនិងអេហ្ស៊ីប។ប៉ុន្តែជាលើកទី១ហើយ ចាប់តាំងពី១០ឆ្នាំមកដែលកងទ័ពកូរ៉េខាងត្បូងធ្វើ” សង្គ្រាមចិត្តសាស្ត្រ “ បែបនេះ។ក៏ប៉ុន្តែសំរាប់អ្នកធ្វើវិភាគមួយចំនួនធំនៅសេអ៊ូល លទ្ធភាពនៃការក្រោកឈរឡើងបះបោរ នៅកូរ៉េខាងជើង នៅតែមានសភាពតិចតួចស្តួចស្តើងណាស់៕
No comments:
Post a Comment