របាយការណ៍ក្រសួងការពារជាតិកូរ៉េខាងត្បូង ចេញផ្សាយ នៅថ្ងៃព្រហស្បតិ៍ ៣០ធ្នូ ២០១០នេះ បង្ហាញថា ក្នុងរយៈពេល ២ឆ្នាំកន្លងទៅនេះ កូរ៉េខាងជើងបានបង្កើនទាំងកម្លាំងកងទ័ពពិសេស និងកម្លាំងកងរថក្រោះ។ ក៏ប៉ុន្តែ ចំនួនទាហានសរុបរបស់កូរ៉េខាងជើង មិនមានការប្រែប្រួលនោះទេ ពោលគឺ នៅតែមានចំនួនប្រមាណជិត ១លាន ២សែននាក់ដដែល។
សេចក្តីរាយការណ៍របស់ សេង ឌីណា
ក្រសួងការពារជាតិកូរ៉េខាងត្បូង តែងតែចេញផ្សាយឯកសារ ស្តីពីនយោបាយការពារជាតិ នៅរៀងរាល់ ២ឆ្នាំម្តង។ ឯកសារឆ្នាំនេះបានគូសបញ្ជាក់ថា កូរ៉េខាងជើងបានបង្កើនចំនួនកងទ័ពពិសេស (កងកុម្ម៉ង់ដូ) ចំនួនយ៉ាងតិច ២ម៉ឺននាក់បន្ថែមទៀត ដែលធ្វើឲ្យចំនួនកងកុម្ម៉ង់ដូកូរ៉េខាងជើងកើនឡើងរហូតដល់ទៅ ២០ម៉ឺននាក់។
របាយការណ៍នេះក៏បានបញ្ជាក់ផងដែរថា កងកុម្ម៉ងដូទាំងនេះបានទទួលការហ្វឹកហ្វឺន សម្រាប់បំពេញបេសកកម្មសម្ងាត់ ដូចជា ការលបធ្វើឃាត និងការលបចូលបំផ្លាញទីតាំងសំខាន់ៗរបស់កូរ៉េខាងត្បូង។
ម្យ៉ាងទៀត នៅឆ្នាំ២០១០នេះ គេឃើញចំនួនរថក្រោះរបស់កូរ៉េខាងជើង មានចំនួនរហូតដល់ទៅ ៤ ១០០គ្រឿង ពោលគឺ ច្រើនជាងកាលពីឆ្នាំ២០០៨ ដល់ទៅ២០០គ្រឿង។ រថក្រោះទាំង២០០គ្រឿងថ្មីនេះ គឺជាប្រភេទរថក្រោះ ដែលកូរ៉េខាងជើងផលិត ដោយយកគំរូតាមរថក្រោះប្រភេទ T-72 របស់រុស្ស៊ី។
ផ្ទុយទៅវិញ ចំនួនកាំភ្លើងធំរបស់កូរ៉េខាងជើងមិនជាមានការប្រែប្រួលអ្វីធំដុំប៉ុន្មានទេ ធៀបនឹងពីរឆ្នាំមុន។ ក៏ប៉ុន្តែ កូរ៉េខាងជើងនៅតែមានសមត្ថភាពគ្រប់គ្រាន់ក្នុងការបាញ់ផ្លោងកម្ទេច រដ្ឋធានីសេអ៊ូល របស់កូរ៉េខាងត្បូងបាន។
ក្រសួងការពារជាតិកូរ៉េខាងត្បូងបានធ្វើការសន្និដ្ឋានជារួមថា នៅក្នុងករណីមានសង្រ្គាមជាមួយកូរ៉េខាងត្បូង យុទ្ធសាស្រ្តរបស់កូរ៉េខាងជើង គឺផ្អែកជាសំខាន់ទៅលើអាវុធនុយក្លេអ៊ែរ, កងកុម្ម៉ង់ដូ, នាវាមុជទឹក, កាំភ្លើងធំ និងសង្រ្គាមតាមបណ្តាញកុំព្យូទ័រ ពោលគឺ សុទ្ធសឹងជាយុទ្ធសាស្រ្តលបវាយឆ្មក់ ឬវាយប្រហារពីចម្ងាយ។ ទោះជាយ៉ាងណា កូរ៉េខាងត្បូងយល់ថា សង្រ្គាមរវាងកូរ៉េទាំងពីរទំនងជាមិនអាចផ្ទុះឡើងបានទេ ដោយសារតែមានកងទ័ពអាមេរិកចំនួន ២ម៉ឺន ៨ពាន់នាក់ ឈរជើងជាប្រចាំ នៅកូរ៉េខាងត្បូង។
របាយការណ៍ក្រសួងការពារជាតិកូរ៉េខាងត្បូងនេះ ត្រូវបានចុះផ្សាយតែមួយថ្ងៃប៉ុណ្ណោះ ក្រោយពីលោកលី ម្យ៉ុងបាក់ ប្រធានាធិបតីកូរ៉េខាងត្បូង បានប្រកាសថា កូរ៉េខាងត្បូងមិនមានជម្រើសអ្វីផ្សេង ក្រៅតែពីចរចាជាមួយកូរ៉េខាងជើង ដើម្បីឲ្យកូរ៉េខាងជើងបោះបង់កម្មវិធីនុយក្លេអ៊ែរ។
នៅពេលនេះ កូរ៉េខាងជើងមានសារធាតុភ្លុយតូញ៉ូមប្រមាណជា ៤០គីឡូក្រាម ដែលអាចផលិតគ្រាប់បែកនុយក្លេអ៊ែរបានចំនួន ពី ៦ ទៅ ៨គ្រាប់។ ក្រៅពីភ្លុយតូញ៉ូម កូរ៉េខាងជើងចាប់ផ្តើមមានបច្ចេកវិទ្យាគ្រប់គ្រាន់ ក្នុងការផលិតអាវុធនុយក្លេអ៊ែរ ដោយប្រើវិធីមួយទៀត គឺអ៊ុយរ៉ាញ៉ូម៕
By RFI...
No comments:
Post a Comment