លទ្ធផលនៃទស្សនកិច្ចរបស់លោក Bill Richardson នៅទីក្រុងព្យុងយ៉ាង អាចទទួលយកបានដោយមោទនភាព ព្រោះក្នុងពេលដែលក្រុងសេអ៊ូលធ្វើសមយុទ្ធដោយបាញ់គ្រាប់មែនទែន កូរ៉េខាងជើងអាចរក្សាភាពស្ងប់ស្ងាត់ ទប់ចិត្តទប់ថ្លើមមិនតបត ដូចបានព្រមានកាលពីសប្តាហ៍មុនៗទេ។ របបកុម្មុយនិស្តព្យុងយ៉ាងបានបើកទ្វារទទួល សហគមន៍អន្តរជាតិ ឲ្យវិលទៅត្រួតពិនិត្យកម្មវិធីនុយក្លេអ៊ែររបស់ខ្លួនជាថ្មី និងហាក់ដូចជាចង់វិលមករកតុចរចាវិញ។ ដូច្នេះពេលនេះ ជាវេលានៃការបង្ហាញសកម្មភាពជាក់ស្តែង។
វាជាការកម្រណាស់ ដែលគេឃើញកូរ៉េខាងជើង បើកទ្វារទទួលទីភ្នាក់ងារថាមពលបរមាណូអន្តរជាតិ លើទឹកដីរបស់ខ្លួន។ ប៉ុន្តែគ្រប់គ្នាសុទ្ធតែទទួលយកសំណើរបស់ក្រុងព្យុងយ៉ាង ដោយប្រុងប្រយ័ត្នបំផុត ព្រោះជានិច្ចកាល កូរ៉េខាងជើងតែងប្រើក្បួនបង្កហេតុរករឿងឲ្យដល់កំរិតតានតឹងខ្លាំង ទើបធ្វើជាងាកមកយល់ព្រមចូលចរចា ដើម្បីងាយទាញយកចំណេញនយោបាយ និងទាញយកជំនួយសេដ្ឋកិច្ច។
សហរដ្ឋអាមេរិក និងជប៉ុន មិនទាន់យល់ព្រមនឹងសំណើសុំចរចានុយក្លេអ៊ែរនេះទេ ប៉ុន្តែបានបញ្ជាក់ហើយបញ្ជាក់ទៀតអំពីលក្ខខណ្ឌ នៃការចាប់ផ្តើម ប្រាប់ទីភ្នាក់ងារថាមពលបរមាណូអន្តរជាតិ ថាមិនចង់ឃើញកូរ៉េខាងជើងជាអ្នកកំណត់ពេល និងជាអ្នកកំណត់លទ្ធផលនេះការចរចា ដោយចង់ដើរចេញពីតុវិញស្រេចតែចិត្ត ដូចលើកមុនៗឡើយ។
ចំណែកខាងបារាំង និងអង់គ្លេសវិញ មិនសូវ ជាតឹងតែងពេកទេ ចំពោះការដែលទីភ្នាក់ងារបរមាណូអន្តរជាតិ ទៅត្រួតពិនិត្យមជ្ឈមណ្ឌលយុងព្យុន ប៉ុន្តែគេទាមទារចង់ចូលដល់មជ្ឈមណ្ឌលចម្រើនធាតុអ៊ុយរ៉ានីញូមថ្មី ដែលទើបបង្ហើបដឹង។
ភាពតានតឹងនៅតែបន្ត
មួយថ្ងៃក្រោយការអត់ធ្មត់ទប់ចិត្តទប់ថ្លើមរបស់កូរ៉េខាងជើង និងការយល់ព្រមបើកទ្វារទទួលទីភ្នាក់ងារថាមពលបរមាណូអន្តរជាតិ នៅថ្ងៃអង្គារនេះ កូរ៉េខាងត្បូងស្ថិតក្នុងស្ថានភាពត្រៀមអាសន្នជានិច្ច។ នៅចំពោះមុខរដ្ឋសភាជាតិ លោករដ្ឋមន្ត្រីក្រសួងការពារជាតិកូរ៉េខាងត្បូង បានប្រកាសថា “នេះជាវិបត្តិការពារជាតិដ៏ធ្ងន់ធ្ងរបំផុតជាងពេលណាៗទាំងអស់ គិតចាប់ពីសង្គ្រាមឆ្នាំ១៩៥០-៥៣មក។ រាល់គ្រប់កម្លាំងទ័ពជើងទឹកត្រូវតែរក្សាភាពប្រុងប្រយ័ត្នកំរិតខ្ពស់ ក្រែងមានការវាយបកពីសំណាក់កូរ៉េខាងជើងជាបងប្អូនសត្រូវ ជាយថាហេតុណាមួយ”។
នៅតាមព្រំដែន ភាគពាយ័ព្យ កងកម្លាំងទ័ពជាច្រើនត្រូវបានគេដាក់ពង្រាយ និងស្ថិតក្នុងលក្ខណៈត្រៀមអាសន្នកំរិតខ្ពស់បំផុត។ ព្រឹកមិញ ជាលើកទីមួយ គិតចាប់តាំងពីឆ្នាំ ២០០៤មក (ឆ្នាំដែលកូរ៉េខាងពីរបានយល់ព្រមគ្នាថា នឹងមិនធ្វើសកម្មភាពដែលមានលក្ខណៈបំផុសបំផុលឃោសនា នៅតាមព្រំដែន) ក្រុមអ្នកកាន់សាសនាប្រូតេស្តង់ កូរ៉េខាងត្បូង បានទទួលការអនុញ្ញាត ឲ្យរៀបចំតុបតែង រំយោលភ្លើងអគ្គិសនី លម្អដើមស្រល់ (Sapin) ដ៏ធំស្កឹមស្កៃ នៅជាប់ព្រំប្រទល់ជាមួយនឹងកូរ៉េខាងជើង សម្រាប់ថ្ងៃបុណ្យណូអែល។ ដើមស្រល់ ដែលស្ថិតនៅកំពូលកូនភ្នំ បីគីឡូម៉ែត្រប៉ុណ្ណោះ ពីព្រំដែន ជាតំណាងនៃភាពមានបាន ស្តុកស្តម្ភ សម្បូរបែបរបស់បណ្តាជនកូរ៉េខាងត្បូង ហើយដែលគេអាចមើលឃើញយ៉ាងច្បាស់ពីកូរ៉េខាងជើង។
សំរាប់ក្រុមប្រូតេស្តង់ ការលម្អដើមស្រល់នេះ ធ្វើឡើងក្នុងពិធីបុណ្យសាសនា សុទ្ធសាធ ប៉ុន្តែកូរ៉េខាងជើងបានប្រឆាំងដាច់ខាត និងហាមមិនឲ្យអុជភ្លើងបំភ្លឺអបអរថ្ងៃបុណ្យណូអែលទេ។ កូរ៉េខាងជើងបានព្រមានថានឹងបាញ់កម្ទេចដើមស្រល់នោះភ្លាមបើឃើញមានភ្លើងលម្អឆេះ៕
By rfi...
No comments:
Post a Comment