ពីរថ្ងៃកន្លងមកហើយ ដែលកងទ័ពសម្ព័ន្ធមិត្ត ដឹកនាំដោយបារាំង អង់គ្លេស និងអាមេរិក បានបើកធ្វើប្រតិបត្តិការយោធានៅលីប៊ី។ ក្រុមសម្ព័ន្ធមិត្តបានប្រើយន្តហោះ និងមីស៊ីលទំនើបៗរាប់រយដើម វាយប្រហារទៅលើកងរថក្រោះ ទីតាំងរ៉ាដា ទីតាំងមីស៊ីលប្រឆាំងយន្តហោះ និងទីបញ្ជាការនៃកងកម្លាំងរបស់លោកកាដាហ្វ៊ី។ សហព័ន្ធអារ៉ាប់ ដែលជាអ្នកបានស្នើសុំឲ្យមានអន្តរាគមន៍យោធានៅលីប៊ីនោះ បែរជាបានរិះគន់ប្រតិបត្តិការយោធារបស់កងទ័ពសម្ព័ន្ធមិត្តទៅវិញ ដោយលើកឡើងថា ប្រតិបត្តិការយោធានេះបានធ្វើហួសពីការកំណត់របស់ក្រុមប្រឹក្សាសន្តិសុខ។
ប្រតិបត្តិការយោធានៅលីប៊ីបានចាប់ផ្តើមធ្វើឡើង កាលពីថ្ងៃសៅរ៍ ១៩ មីនា ២០១១។ កងទ័ពដែលចេញធ្វើសកម្មភាពមុនគេ គឺកងទ័ពអាកាសរបស់បារាំង។ យន្តហោះចម្បាំងរបស់បារាំងប្រមាណ ២០គ្រឿងបានហោះក្រវែលពីលើទីក្រុង Benghazi ដែលជាជម្រកចុងក្រោយរបស់ចលនាបដិវត្តន៍លីប៊ី។ នៅពេលល្ងាច យន្តហោះបារាំងក៏បានធ្វើការវាយប្រហារទៅលើកងរថក្រោះរបស់លោក កាដាហ្វ៊ី ដែលព្យាយាមវាយលុកចូលក្នុងក្រុង Benghazi ។
នៅយប់ថ្ងៃសៅរ៍ កងទ័ពអាមេរិក និងកងទ័ពអង់គ្លេសក៏បានចាប់ផ្តើមបើកការវាយប្រហារទៅលើទីតាំងរ៉ាដា និងទីតាំងមីស៊ីលបាញ់យន្តហោះរបស់លោកកាដាហ្វ៊ី ដែលស្ថិតនៅជុំវិញរដ្ឋធានីទ្រីប៉ូលី។ មីស៊ីល ប្រភេទ Tomahawk ជាងមួយរយដើម ត្រូវបានកងទ័ពអាមេរិកបាញ់ចេញពីនាវាពិឃាដ (Destroyer) និងនាវាមុជទឹក ដែលកំពុងឈរជើង នៅក្នុងសមុទ្រមេឌីទេរ៉ានេ។
នៅថ្ងៃអាទិត្យ នៅក្នុងពេលដែលយន្តហោះបារាំងហោះល្បាតដែនអាកាសលីប៊ី យន្តហោះប្រភេទ B-2 របស់អាមេរិក និងយន្តហោះប្រភេទ Tornado របស់អង់គ្លេស បានទម្លាក់គ្រាប់បែករាប់សិបគ្រាប់ ទៅលើព្រលានយន្តហោះយោធាលីប៊ី។ នៅយប់ថ្ងៃអាទិត្យ ទីបញ្ជាការយោធា ដែលស្ថិតនៅក្នុងបរិវេណផ្ទះរបស់លោកកាដាហ្វ៊ីត្រូវបានកម្ទេចដោយ មីស៊ីលរបស់អាមេរិក។
កាលពីថ្ងៃអាទិត្យ ម្សិលមិញនេះ អគ្គលេខាធិការសហព័ន្ធអារ៉ាប់បានរិះគន់ប្រតិបត្តិការយោធារបស់លោក ខាងលិចថា បានធ្វើហួសពីការកំណត់របស់ក្រុមប្រឹក្សាសន្តិសុខអ.ស.ប.។ ក៏ប៉ុន្តែ មន្រ្តីយោធាអាមេរិកបានធ្វើការឆ្លើយតបមកវិញដោយប្រយោលថា សេចក្តីសម្រេចលេខ ១៩៧៣ របស់ក្រុមប្រឹក្សាសន្តិសុខបានអនុញ្ញាតឲ្យ "ចាត់រាល់វិធានការចាំបាច់” ដើម្បីការពារជនស៊ីវិល ដែលមានន័យថា អាចជាការបង្កើតតំបន់ហាមឃាត់ការហោះហើរ និងអាចជាប្រតិបត្តិការយោធាក្នុងរូបភាពផ្សេងទៀត លើកលែងតែការប្រើកងទ័ពជើងគោកចូលកាន់កាប់ប្រទេសលីប៊ី ដែលត្រូវហាមឃាត់។ បារាំង និងអង់គ្លេសក៏បានថ្លែងការពារខ្លួនស្រដៀងគ្នាដែរថា ប្រតិបត្តិការយោធានៅលីប៊ី គឺធ្វើស្របតាមសេចក្តីសម្រេចរបស់ក្រុមប្រឹក្សាសន្តិសុខទាំងស្រុង។
គួរបញ្ជាក់ថា ក្នុងពេលដែលអគ្គលេខាធិការសហព័ន្ធអារ៉ាប់រិះគន់លោកខាងលិច ប្រទេសកាតារ និងអេមីរ៉ាតអារ៉ាប់រួម ដែលជាសមាជិកសហព័ន្ធអារ៉ាប់ បានគាំទ្រ និងសន្យាចូលរួមក្នុងប្រតិបត្តិការយោធានៅលីប៊ី។ កាតារបានបញ្ជូនយន្តហោះចម្បាំង ៤គ្រឿង ឲ្យមកចូលរួមហោះល្បាតដែនអាកាសលីប៊ី ជាមួយយន្តហោះបារាំង។
នៅថ្ងៃចន្ទនេះ ក្នុងពេលជួបជាមួយលោកបាន គីមូន អគ្គលេខាធិការអ.ស.ប. លោកអគ្គលេខាធិការសហព័ន្ធអារ៉ាប់ហាក់ដូចជាបានកែប្រែជំហរមកវិញ ដោយបានថ្លែងថា សហព័ន្ធអារ៉ាប់គាំទ្រទាំងស្រុងនូវសេចក្តីសម្រេចលេខ ១៩៧៣ របស់ក្រុមប្រឹក្សាសន្តិសុខ។ លោកក៏បានបញ្ជាក់ផងដែរថា ពាក្យសម្តីរបស់លោក កាលពីថ្ងៃអាទិត្យ ត្រូវបានគេយកទៅបកស្រាយខុស។ អ្វីដែលលោកចង់និយាយ គឺគ្រាន់តែចង់សម្តែងនូវការព្រួយបារម្ភខ្លាចមានជនស៊ីវិលត្រូវ រងគ្រោះ ដោយការទម្លាក់គ្រាប់បែករបស់កងកម្លាំងសម្ព័ន្ធមិត្តតែប៉ុណ្ណោះ៕
Link: http://www.khmer.rfi.fr/arab-league-criticizes-air-strike-on-libya
No comments:
Post a Comment