ការ​បើក​កិច្ច​​ចរចា​​រវាង​កូរ៉េ​​ទាំង​ពីរ​ស្តីពី​​កម្មវិធី​នុយក្លេអ៊ែរ​​នៅ​កោះបាលី​

អន្តរការីកូរ៉េខាងត្បូង លោក Wi Sung-lac (ស្តាំ)និងអន្តរការីកូរ៉េខាងជើង​​លោក Ri Yong-Ho ដែលជាអនុរដ្ឋមន្ត្រី​ក្រសួងការបរទេសកូរ៉េខាងជើង​ចាប់ដៃគ្នា​នាពេលជួបគ្នា​នៅសណ្ឋាគារ​នៅNusa Dua,Bali, ២២កក្កដា​២០១១។​

អន្តរការី​​​កូរ៉េ​ខាងត្បូង​​និង​​ខាង​ជើង ​បាន​​​ជួប​គ្នា​​នា​​ថ្ងៃ​​សុក្រ​​២២​​កក្កដា​​នេះ​នៅ​​លើ​កោះ​​បាលី​​​ប្រទេស​​​ឥណ្ឌូណេស៊ី។ គឺ​​​ជា​​កិច្ច​ចរចា​​ដ៏​សំខាន់​និង​លើក​ទី​មួយ​រវាង​​ភាគី​កូរ៉េ​ទាំង​ពីរ ស្តីពី ការរំសាយ​អាវុធនុយក្លេអ៊ែរ របស់កូរ៉េខាងជើង គិតចាប់តាំងពីឆ្នាំ ​២០០៨​​មក។​ ម្យ៉ាង​ទៀត ជំនួប​​​​​​នេះ ​គឺ​​ដើម្បី​រៀបចំ​នូវ​ជំនួប​ប្រាស្រ័យ​​មួយ​ថ្នាក់​រដ្ឋ​មន្ត្រី​​ក្រសួង​​ការបរទេស​​​​កូរ៉េ​ខាង​ត្បូង​​លោក Kim Sung-Hwan ​និង​​សមភាគី​​កូរ៉េ​ខាងជើង​លោក Pak Ui-Chun នៅកោះបាលី​ ជា​ជាទី​ដែល​មាន​​សម័យ​​ប្រជុំ​​មួយ​របស់អាស៊ាន​ស្តីពី​សន្តិសុខ​ក្នុង​តំបន់ដែរ​។
គឺ​​ជា​ជំនួប​ប្រាស្រ័យ​លើក​ទី​មួយ​រវាង​អន្តរការីរបស់​កូរ៉េ​ទាំងពីរ ​ចាប់តាំងពី ពីរ​ឆ្នាំ​៧​ខែ​មក​ហើយ។ នេះ ជាការគូសបញ្ជាក់​របស់ អ្នក​នាំពាក្យ​ម្នាក់​នៃ​ក្រសួង​ការបរទេស​កូរ៉េខាងត្បូង​ដែលបាន​អះអាងទៀតថា ជំនួបនេះ​ បាន​ផ្តើមឡើង​នៅ​ម៉ោង ៧ ម៉ោងសកល​ រវាង អន្តរការី​កូរ៉េខាង​ត្បូង លោក Wi Sung-Lac និង​អន្តរការី​​កូរ៉េខាងជើង លោក Ri Yong-Ho។

ជាការចរចា​ប្រកប​ដោយ​លក្ខណៈស្ថាបនា ព្រោះ ភាគីទាំងពីរ សុទ្ធតែបាន​បង្ហាញ​ពីចេតនា វិល​ទៅកាន់​តុចរចា ៦ ភាគី ក្នុង​ពេល​ដ៏ខ្លី​ខាងមុខ តាមតែ​អាច​ធ្វើ​ទៅបាន។

គួររំលឹកថា កូរ៉េខាងជើង ធ្លាប់​បាន​ដើរ​ចេញ​ពី​តុ​ចរចា​រ៦​ភាគី( ​​កូរ៉េ​ទាំង​​​ពីរ សហរដ្ឋ​អាមេរិក​​ រុស្ស៊ី​ ​​ចិន​​និង​​ជប៉ុន) ​​ស្តីពីការរំសាយ​កម្មវិធី​នុយក្លេអ៊ែរ​កូរ៉េ​ខាងជើង​​កាលពី​ខែ​​ធ្នូ​​ឆ្នាំ​២០០៨។​ ដោយ​​ថែមទាំង​បាន​ផ្គើន សហគមន៍អន្តរជាតិតាមរយៈការបាញ់​សាកល្បង​កាំជ្រួច​នុយក្លេអ៊ែរ​ជាលើកទីពីរ។ តាំងពី​ពេល​នោះ​មក កូរ៉េ​ខាង​ជើង បាន​ច្រាន​ចោល​កិច្ច​ចរចា ​ជា​ឧភតោភាគី​ជាមួយ​កូរ៉េខាងត្បូង​​ស្តីពីកម្មវិធីអាវុធ​​នុយក្លេអ៊ែរ​​​របស់​​ខ្លួន​​​ទៀត​ដោយ​​​កូរ៉េ​ខាង​​ជើង​សំអាង​​ថា​ អាវុធនុយក្លេអ៊ែរ​​​នេះ​ ជា​​មធ្យោបាយ​តែ​មួយគត់​ ​សំរាប់​​ប្រឆាំង​តទល់​​​នឹង​​សហរដ្ឋអាមេរិក។

ប្រទេសចិនវិញ ​ដែលជាសម្ព័ន្ធមិត្តចាក់ទឹកមិនលិច​​របស់​កូរ៉េ​ខាងជើងតែងបានខិតខំ​និយាយ​បញ្ចុះ​បញ្ចូល​ដើម្បី​​​ជំរុញ​​កូរ៉េខាងជើង​ឲ្យសុខចិត្ត​ធ្វើកា​រ​ចរចា​ជាមួយ​កូរ៉េ​ខាង​ត្បូង​​ មុន​​នឹងចូល​​​​ចរចា​ ជាមួយ ​៦​ភាគី។

យ៉ាងណាមិញ កិច្ច​សន្ទនា​នៅ​ថ្ងៃ ​សុក្រ​ ២២​ កក្កដា​នេះ ត្រូវ​បាន​ប្រព្រឹត្ត​ទៅ បន្ទាប់ពី​ទំនាក់​ទំនង​​រវាង​កូរ៉េ​ទាំង​ពីរ បានធ្លាក់ចុះយ៉ាងដុនដាប​​ ​អស់រយៈពេល​ជាង​មួយ​ឆ្នាំ​កន្លង​មក​ហើយ។
កូរ៉េខាងត្បូង ទាមទារ​ឲ្យទីក្រុង​ព្យុងយ៉ាង សុំទោសខ្លួន បន្ទាប់ពីមាន​ឧប្បត្តិហេតុ​ដ៏​ធ្ងន់ធ្ងរ​ពីរ​កើតឡើង​នៅឆ្នាំ ២០១០ ។ គឺនៅខែមីនា កូរ៉េជាងជើង-បាន​បាញ់​ផ្លោង​គ្រាប់បែក​ប្រឆាំង​​ទល់​នឹង​នាវា​មុជទឹក​កូរ៉េ​ខាង​ត្បូង និង ម្តងទៀត​នៅខែវិច្ឆិកា​ បាន​បាញ់​គ្រាប់​បែក​ទៀតប្រឆាំង​ទៅ​​​លើកោះមួយ​របស់កូរ៉េខាងត្បូង។ ក៏​ប៉ុន្តែ​មក​ទល់​ពេល​នេះ កូរ៉េខាងជើង បាន​បដិសេធ​​ជានិច្ច ចំពោះ ការចោទប្រកាន់ទាំងពីរលើករបស់កូរ៉េខាងត្បូងនេះ៕
Link:http://www.khmer.rfi.fr/The%20nuclear%20envoys%20of%20Southe%20and%20North%20Korea%20meet%20%20on%20the%20sidelines%20of%20an%20Asian%20forum%20in%20Bali%20on%20Friday%20to%20talk%20about%20nuclear.